انتبهو من اورام الثدى

[size=32] انا بنقل هذا للا فادة ابنات كانت امى اصابت بالورم الحميد بس كانت عندها تقريبا 40 سنه وكان الورم كبر عندها اوى فى الثدى وتشعب وطبعا ده كان ليه عواقب وخيمه وخصوصا انها اكتشفت ده متأخر اوى وعملت عمليه واخدت خمس ابر كيماوى بعدها بس الحمدلله خفت وربنا رجعهالنا بالسلامه

طبعا انا لما كان عمرى عشرين سنه عرفت ان الورم ده ساعات يجى بالوراثه وفى ناس بيجيلها من غير مايكون فى تاريخ وراثى للاصابه بيه
بس اكيد كنت قلقانه جدا منه وخصوصا بعد مرض ماما وشوفت اد ايه هى تعبت ونفسيتها كانت تعبانه ازاى والكيماوى كان صعب اد ايه ربنا مايكتبها على حد ابدا يارب
وكنت دايما بكشف على نفسى بصفه دوريه علشان اطمن على نفسى بس للاسف والحمدلله على كل شىء اكتشفت ان فى جزء شبة الكورة الناشفه وصغيرة فى الثدى الشمال وكنت بحسها اوى وخاصة وانا حاطة الشاور جيل على جسمى وانا باخد شاور وطبعا اتوهمت اوى وقلقت ومكنتش عارفه انام وعدت عليا ايام صعبه اوى بجد وخاصة انى مكتوب كتابى وكنت حاسه ان حياتى هتدمر
بس قولت اروح اكشف الاول من ورا اهلى جايز يكون ده وهم وميكونش عندى حاجه وكده كده لازم اقول لخطيبى ما هو لو بيحبنى وانسان فعلا كويس مش هيسيبنى ومش هيتخلى عنى
روحت كشفت عند دكتور وكنت بجد متضايقه اوى بس غصب عنى هعمل ايه مع العلم انا عندى 24 سنه الدكتور قالى انه شاكك فى الثدى الشمال وطلب منى اعمل اشعه موجات فوق صوتيه لانها ااامن اشعه على الجسم وملهاش اى تأثير سلبى
اخدت خطيبى معايا وعملت الاشعه واكتشفت انى عندى ورم فى الثدى اليمين وكان عميق جدا علشان كده محستهوش بأيدى كان 4 سم
وورم فى الثدى الشمال وده ال انا كنت حسيت بيه وكان 3 سم تقريبا طبعا انهرت اول ماعرفت وحسيت ان حياتى خلاص اتدمرت بس دكتور الاشعه اعد يطمنى ويقولى ده ورم حميد متقلقيش الدكتور يادوب هيشيل الورم بس مش هيشيل الثدى كله لان ده حميد ولسه فى اوله متشعبش بس بردو كنت قلقانه اوى وكنت محرجه اوى من خطيبى بس يلا بقى
روحنا وقولنا لاهلى وطبعا زعلو اوى ونفسيتهم كانت زى الزفت لغاية تانى يوم ماروحت للدكتور وقالى انى لحقت نفسى فى الاول والموضوع فى الاول بيكون احسن وقالى انه هيشيل الورم بس من الثدى وتوكلت على الله وعملت العمليه والحمدلله قمت بالسلامه

انا حكيتلكم ورغيت كل ده علشان عايزاكو تنتبهو لحاجات مهمه اوى
اولا لازم الواحده تكشف على نفسها كشف دورى كل شهر اثناء الشاور بعد الورة الشهريه لان وجود الصابون على الثدى هيخليكى تحسى بصدرك اكتر
ثانيا لازم كل بنت فى سن المراهقه تعمل اشعه موجات فوق صوتيه كل سنتين وكل ست بعد سن التلاتين تعمل الاشعه دى كل سنه والدكتور هو ال قالى كده
انا الدكتور قالى بما ان الورم ده اتصابت بيه اعمل الاشعه كل ست شهور بس ادعولى ربنا مايرجعهوش ليا تانى

طبعا الورم ملهوش اى اعراض غير بس احساس ان فى كولكيعه صغيره تحت الثدى ومش بتبان الا بالضغط على الثدى للداخل اثناء الاستحمام غير كده مكنتش بحس بيها

بجد والله مهم جدا ان كل واحده تكشف على نفسها محدش يستهتر بالموضوع ارجوكم لان الورم ده لما بيتساب سنين طويله بيكبر وبيتشعب فى الثدى كله وبتبقى النتيجه ان الواحده بعد الشر يارب عن اى حد هو استئصال الثدى ده غير الكيماوى والاشعاع والكهرباء لكن لما الورم بيتلحق فى البدايه بيكون احسن طبعا لان العمليه بتبقى استئصال للورم وبس مش للثدى كله
وياريت كل واحده تدخل تقيم الموضوع علشان الكل يستفاد والله انا بكتب الموضوع وانا خارجه من العمليه بقالى اسبوع ولسه مفكتش اللزق من على صدرى ادعولى ربنا يتمم شفائى وابقى كويسه وربنا ميرجعليش المرض ده تانى وان ربنا يعوض صبرى خير ويتمم زواجى على خير ويهدى خطيبى عليا وخصوصا ان احساسى ان فى جرح فى صدرى هيبوظ شكله وهيخلى ثقتى تقل فى نفسى وفى خطيبى ربنا يهديه يارب ولو واحده تعرف اسم كريم كويس يضيع اثار جروح العمليه تقولهولى وربنا يجازيها خير
[/size]